Sunday, July 15, 2018

കൊടകരപുരാണവും കനേഡിയൻ സായിപ്പും ...



ചാറ്റൽമഴയുടെ അലസതയും തിരക്കുകളില്ലാത്ത ശനിയാഴ്ചയുടെ  മടുപ്പുമായി ഇരിക്കുമ്പോഴാണ്, വരിസംഖ്യ അടയ്ക്കുവാനായി ഒരു കോൾ വന്നത്. വിവരങ്ങൾ ശേഖരിച്ചു, പേയ്മെന്റ് എടുക്കുന്നതിനിടയിൽ സൗഹൃദസംഭാഷണത്തിനു തുടക്കമിട്ടു. എന്റെ ഇന്ത്യൻ ചായ്‌വുള്ള ഉച്ഛാരണം കേട്ടിട്ടാവും, അങ്ങേത്തലയ്ക്കൽ ഞാൻ ഇന്ത്യയിലാണോ എന്ന സംശയം ഭാര്യയും ഭർത്താവും കൂടി പങ്കുവെക്കുന്നുണ്ടായിരുന്നു. കാനഡയിൽ എവിടെയാണു ഞാനെന്ന്  ഒന്നുകൂടി ചോദിച്ചുറപ്പിച്ചു, ഭർത്താവായ റോബർട്ട്. ടൊറന്റോയിലെ മിസ്സിസ്സാഗയിലാണെന്നു പറഞ്ഞപ്പോൾ ഭാര്യയുടെ സംശയം, അപ്പോൾ ദിവസവും പോയി വരികയാണോ എന്നായിരുന്നു.... !! 

എന്റെ മനസിലേക്കോടിയെത്തിയത്, വിശാലമനസ്ക്കന്റെ കൊടകരപുരാണമായിരുന്നു.  പൊട്ടിച്ചിരിച്ചു പോയി, അതേ, 110 എക്സ്പ്രസ്സ് ബസ്സിൽ പോയി വരും എന്നു പറഞ്ഞു. "വീട് കൊടകരേല്, കുടി ഫുജൈറേല്, ഡെയിലി പോയിവരും" എന്ന പ്രശസ്തമായ ആ പ്രസ്താവന വീണ്ടും വീണ്ടും ഓർത്തു ചിരിച്ചു.  എന്റെ അടുത്തിരുന്ന സഹപ്രവർത്തകനും ഫോണിന്റെ അങ്ങേത്തലയ്‌ക്കലുള്ളവർക്കും എന്റെ ചിരിയുടെ അർത്ഥം മനസിലായതേയില്ല... ! (കൊടകരപുരാണം അറിയാത്തവരോട് എന്തു പറയാൻ... !! ) 

--------------------------------------------------------------------------------------
കുറച്ചു ദിവസമായി സുബ്ബു വീട്ടിലുണ്ട്. കഴിഞ്ഞ ആഴ്ചയിലെ ഒരു  ദിവസം പെഡൽ പൊട്ടിപ്പോയ സൈക്കിൾ നന്നാക്കാൻ കനേഡിയൻ ടയറിൽ കൊടുത്തിരുന്നു.   ഇന്നാണ്, അതു റെഡിയായിട്ടുണ്ടെന്നു പറഞ്ഞു വിളിച്ചത്. കേട്ടപാതി സുബ്ബു ഓടി, കനേഡിയൻ ടയറിലേക്ക് .... ഏതാണ്ടു, ഒരു മണിക്കൂറിനു ശേഷം വെറുംകൈയോടെ തിരിച്ചുവന്നു. എന്തുപറ്റിയെന്ന അന്വേഷണം, മറ്റൊരു ചിരിക്കും വകയായി. 

കനേഡിയൻ ടയറിൽ ചെന്നപ്പോൾ എല്ലാം ശരിയാക്കിയിട്ടുണ്ടെന്നു പറഞ്ഞു, ബില്ലെടുത്തു സുബ്ബുവിന്റെ കൈയിൽ കൊടുത്തു ആദ്യം. സൈക്കിൾ എവിടെ എന്നു ചോദിച്ചപ്പോൾ കാണിച്ചു കൊടുക്കുകയും ചെയ്തു. പെഡൽ ഒഴികെ എല്ലാം നന്നാക്കിയിട്ടുണ്ടത്രേ. അപേക്ഷാഫോറത്തിൽ 'ഫിക്സ് ദ പെഡൽ' എന്നെഴുതിയത് വായിക്കാൻ ആ സായിപ്പിനു അറിയില്ലായിരുന്നു എന്നതായിരുന്നു കാരണം. 

സ്വന്തം ഭാഷ, തെറ്റുകൂടാതെ എഴുതാനും വായിക്കാനും അറിയില്ലെങ്കിലും 
നമ്മളെ ഉച്ഛാരണത്തിന്റെ പേരിൽ പരിഹസിക്കുവാൻ വലിയ മിടുക്കാണ്. 


Friday, June 29, 2018

മേപ്പിൾ വീഥികളിലൂടെ ...

ബില്ലിങ് പ്രകാരമുള്ള പണം കെട്ടുന്നതിനായി ഉപഭോക്താവിനെ ഓര്മിപ്പിക്കാനാണ് ഫോണിൽ വിളിച്ചത്.   എറിക്കിനെ  കിട്ടുമോയെന്നുള്ള അന്വേഷണത്തിൽ അങ്ങേത്തലയ്ക്കൽ അടക്കിപ്പിടിച്ചൊരു പൊട്ടിക്കരച്ചിലിന്റെ ചീളുകളാണ് ഫോണിലൂടെ കേട്ടത്. ഒരു നിമിഷം എന്തു പറയണമെന്നറിയാതെ വിഷമിച്ചു, വീണ്ടും എറിക്കിനെ കിട്ടുമോയെന്നു ചോദിച്ചു. അപ്പോഴേക്കും മറ്റാരോ ഫോൺ വാങ്ങി. എറിക്ക് മരിച്ചുപോയെന്ന്  നിർവികാരതയോടെ ഒറ്റ ശ്വാസത്തിൽ പറഞ്ഞു നിർത്തി. പതിവുപോലെ അനുശോചനം നടത്തി കാര്യത്തിലേക്കു കടക്കാനൊരുങ്ങിയതാണ്. അപ്പോഴാണ് അപ്പുറത്തു പൊട്ടിക്കരച്ചിലുകൾ ഉച്ചത്തിലായത്. ഏതാനും നിമിഷങ്ങൾ കഴിഞ്ഞപ്പോൾ വല്ലാത്തൊരു നിശബ്ദത ഫോണിൽ നിറഞ്ഞു. അങ്ങേത്തലയ്ക്കൽ ആളുണ്ടോ എന്നറിയാനായി പതിഞ്ഞ ശബ്ദത്തിൽ ഹലോ പറഞ്ഞു. അപ്പുറത്ത് സമനില വീണ്ടെടുത്ത ആരോ ക്ഷമാപണം നടത്തി. കാര്യമന്വേഷിച്ചു.... പണമടയ്‌ക്കേണ്ട ദിവസത്തെക്കുറിച്ചു പറഞ്ഞു.

എറിക്കിന്റെ അമ്മയായിരുന്നു സംസാരിച്ചത്. ആദ്യം ഫോൺ എടുത്തത്, എറിക്കിന്റെ ഗേൾഫ്രണ്ട് ആയിരുന്നുവെന്നും അവർക്കൊരു കുഞ്ഞുണ്ടായതിന്റെ അടുത്ത ദിവസമാണ് എറിക്ക് മരിച്ചതെന്നും അമ്മ  പറഞ്ഞു.  അമ്മയും അച്ഛനും, ഭാര്യയെയും കുഞ്ഞിനെയുമായി വീട്ടിലേക്കു വരുന്നതിനു മുമ്പേ വീടു അലങ്കരിക്കാൻ വേണ്ടി പോയതാണ് എറിക്ക്. ഡ്രൈവ് വേയിൽ കാറു നിറുത്തി ഇറങ്ങുമ്പോഴേക്കും എവിടുന്നോ പാഞ്ഞു വന്നൊരു വെടിയുണ്ടയിൽ എറിക്കിന്റെ ജീവൻ പിടഞ്ഞു വീണു.  കേസന്വേഷണം നടക്കുന്നു, എന്നാലും എറിക്കിനെ തിരിച്ചു കിട്ടില്ലല്ലോ എന്ന വേദനയിൽ ആ അമ്മ പറഞ്ഞു നിർത്തുമ്പോഴും നേർത്ത കരച്ചിലിന്റെ ഒലികൾ ഫോണിലൂടെ കേൾക്കാമായിരുന്നു.... !



Related Posts Plugin for WordPress, Blogger...