മണിമുത്തുകള്‍: Inukshuk (ഇനുക്ക് ഷൂക്ക് )

Pic by Sneha

കാനഡയിലെ ആദിവാസികളിൽ ഒന്നായ ഇന്യുട്ട് ഗോത്രവർഗ്ഗക്കാരുടെതാണ് ഇനുക്ഷുക് എന്ന കല്ലു പ്രതിമകൾ. മനുഷ്യന്റെ കഴിവിൽ പ്രവർത്തിക്കുന്നത് എന്നാണത്രേ 'ഇനുക്ഷുക്' എന്നതിനർത്ഥം. ആദിമകാലത്ത് കരയിലും കടലിലുമുള്ള യാത്രക്കാർക്കു വഴികാട്ടിയായിരുന്നു ഇവ. ഇനുക്ഷുക് പ്രധാനമായും കല്ലുകൾ ഒന്നിനു മേലെ ഒന്നായി അടുക്കി വെച്ചുണ്ടാക്കുന്നതാണ്. അവയെ തമ്മിൽ യോജിപ്പിക്കാൻ സിമന്റോ പശയോ ഒന്നും ഉപയോഗിക്കുന്നില്ല.

Inukshuk എന്ന വാക്ക് Inuktitut ലെ രണ്ടു അടിസ്ഥാന പദങ്ങളിൽ നിന്നാണു വന്നത്. Inuk ഒരു വ്യക്തിയെ പരാമർശിക്കുന്നു. suk എന്നാൽ പകരക്കാരൻ എന്നാണർത്ഥം. ആർട്ടിക് പ്രദേശത്തെ അവയുടെ ഉപയോഗത്തിന് അനുയോജ്യമായ ഒരു വിവരണം തന്നെ.

ഇനുക്ഷുക് പല ആകൃതിയിലുമുണ്ടെങ്കിലും കൂടുതലും മനുഷ്യാകൃതിയിലാണ് കാണപ്പെടുന്നത്. മനുഷ്യാകൃതിയിലുള്ള ഈ ഘടനകളെ ഇനുൻഗ്വാട്ട് അല്ലെങ്കിൽ ഇനുൻഗുവാക്ക് എന്നാണ് ഇന്യൂട്ടുകാർ വിളിക്കുന്നത്. റോഡുകളോ ദിശാഅടയാളങ്ങളോ ഇല്ലാതിരുന്ന കാലത്തു ഇവയെ മാർഗ്ഗദർശികളാക്കിയിരുന്നു. ഇനുൻഗ്വാട്ടുകളുടെ ഒരു കൈയുടെ വലുപ്പവ്യത്യാസത്തിൽ ദിശയും വഴിയും മനസ്സിലാക്കാൻ കഴിയുമായിരുന്നുവത്രേ.

ആദിമകാലത്ത് മൃഗങ്ങളെ വേട്ടയാടാനും ഇനുക്ഷുക് ഉപയോഗിച്ചിരുന്നു. ഇന്യൂട്ടുകളുടെ ഇഷ്ടവിഭവമായിരുന്ന 'Caribou' എന്ന കലമാനിനെ കൂട്ടത്തോടെ പിടിക്കാൻ ഇവ ഉപയോഗപ്പെടുത്തിയിരുന്നു. ഇൻക്സ്യൂട്ടിന്റെ (ഇനുക്ഷുകിന്റെ ബഹുവചനം) ഒരു മതിലുണ്ടാക്കി അതിലൂടെ സ്ത്രീകൾ അവയെ ഓടിച്ചു കൊണ്ടു വരികയും പുരുഷന്മാർ ഇനുക്ഷുകിനു പുറകിൽ മറഞ്ഞിരുന്ന് അമ്പെയ്യുകയും ചെയ്താണ് മാനുകളെ പിടിച്ചിരുന്നത്.

ഒരു പിരമിഡിന്റെ ആകൃതിയിൽ ഉണ്ടാക്കുന്ന ഇനുക്ഷുകിനെ വിലയേറിയ സാധനങ്ങളും ഭക്ഷ്യവിഭവങ്ങളും സൂക്ഷിക്കാനും അവർ ഉപയോഗിച്ചിരുന്നു. കൂടാതെ, കത്തുകളും സമ്മാനങ്ങളും കൈമാറാനുള്ള ഒരു തപാൽപ്പെട്ടിയായും ഇവയെ ഉപയോഗപ്പെടുത്തിയിരുന്നു.

ഇന്യൂട്ട് സംസ്ക്കാരത്തിൽ ഇനുൻഗ്വാട്ടുകളുടെ (മനുഷ്യാകൃതിയിൽ ഉണ്ടാക്കിയവ) പങ്ക് ആത്മീയമാണ്. വിശുദ്ധസ്ഥലങ്ങളെ അടയാളപ്പെടുത്താനാണ് ഇനുൻഗ്വാട്ട് ഉപയോഗിക്കുന്നത്.

Pic by Manikyam

ഇന്യൂട്ടുകൾ ഇന്ന് ആധുനിക ജീവിതശൈലി സ്വീകരിച്ചിട്ടുണ്ടെങ്കിലും അവരുടെ പൈതൃകത്തിന്റെ അടയാളമായി ഇനൂക്ഷുക് സംരക്ഷിക്കുന്നു. അവരുടെ വിശ്വാസപ്രകാരം ഇനുക്ഷുക് നശിപ്പിക്കാൻ പാടില്ല എന്നാണ്. ഇന്യൂട്ട് വർഗ്ഗക്കാരുടെ പ്രധാന പ്രദേശമായ നുനാവുട്ട് പ്രവിശ്യയുടെ കൊടിയടയാളവും ഇനുക്ഷുക് തന്നെ. അവിടുത്തെ ബാഫിൻ ദ്വീപിൽ നൂറോളം ഇനുക്ഷുക്കളുണ്ട്. അതിനാൽ കാനഡ, ബാഫിൻ ദ്വീപിനെ ദേശീയചരിത്രപ്രദേശമായി സംരക്ഷിക്കുന്നു. രണ്ടായിരത്തിപ്പത്തിലെ വാൻകൂവർ ഒളിമ്പിക് ഗെയിംസിനു പ്രചോദനമായി കാനഡ ഉപയോഗിച്ചതും ഒരു ഇനുക്ഷുക് ആയിരുന്നു.

ലോകത്തിലെ ഏറ്റവും ഉയരം കൂടിയ ഇനുക്ഷുക് കാനഡയിൽ ഒന്റാരിയോ പ്രവിശ്യയിലെ ഷോംബർഗിലാണുള്ളത്. ഗിന്നസ് വേൾഡ് റെക്കോർഡ് പ്രകാരം 11.377 മീറ്റർ ഉയരവും 8 മീറ്റർ വീതിയും 8200 കിലോ ഭാരവുമുള്ള ഈ ഇനുക്ഷുക് ഓൾസ്റ്റോൺ പ്രോഡക്ട്സിലെ ശ്രീ. ജോസ് മെലോ സൃഷ്ടിച്ചതാണ്.